මේක මම කලින් සේවය කරපු ආයතනයේදී අහන්න ලැබුන රසබර සිද්දියක්. මේ කතාවෙ එන ප්‍රධාන චරිත දෙකම මේ බ්ලොගයේ පාඨකයින්. ඒත් මොනව කරන්නද කියන්න ගත්තාම කියන්නම වෙනවා. නැත්තන් කියනකම්ම කට නලියනවා. ඔන්න මම නම් ගම් ටික වෙනස් කලා හරිද?
මම කලින් සේවය කලේ ප්‍රසිද්ධ මුර්දුකාන්ග සමාගමක( දැන් ඉන්නෙත් ඒවයින් එකකම තමයි ). මේකෙ තිබුන එක්තරා ප්‍රොජෙක්ට් එකක මැනේජර් විදියට වැඩකලේ රුචිර කියලා පොරක්. මිනිහා මාර උනන්දුවා. හරිම කලබලයි. ප්‍රොජෙක්ට් එකක ඩෙඩ්ලයින් එහෙම ලන්වෙනකොට මිනිහා හැසිරෙන්නෙ හරියට කඩියෙක් සාක්කුවේ දාගෙන වගෙයි. කවුරුත් අසනීපෙකටවත් නිවාඩු ගිහින්නම් බොරු ඒකාලෙට. හැබැයි වැඩකාරයා.
ඔන්න ඒ ප්‍රොජෙක්ට් එකේම වැඩකලා මගේ එලම පිට් එකක් හිරාන් කියලා. හිරානයා වැඩකාරයා. ඕන දෙයක් බය නැතිව දෙන්න පුලුවන් කොහොම හරි ගොඩදානවා. ඒක නිසාම රුචිරයාගෙනුත් බේරිල්ලක් නෑ මූටම තමා දෙන්නෙ වැඩ.
දවසක් හිරානයට ඕනවුනා නිවාඩුවක් ගන්න. හේතුවකට නෙවෙයි පොඩි රෙස්ට් එකක් ගන්න කොටින්ම කිව්වොත් කම්මැලිකමට. මූ උදේම කෝල් කලා රුචිරට කිව්වා මට සහලෝලා උන ඔෆිස් එන්න වෙන්නෙ නෑ කියලා. ඒක ඇහුවා විතරයි රුචිරයගේ ඇගේ ලේ පොල් කට්ටක් විතර පිච්චුනා. ඒත් මොනවා කරන්නද අසනීපනම්.
ඔන්න ඉතින් එදා වැඩ කෙරීගෙන යනවා ඔෆ්ස් එකේ. කරුමෙට වගේ හිරානයගේ කෝඩ් කෑල්ලක මොකක්ද හුටපටයක්. ඒත් මූ නිවාඩුනේ. රුචිරයා බැලුවා බැලුවා ඔක ගොඩදාන්න. බැරිම තැන ගත්ත හිරානයට කෝල් එකක්. අම්මට සිරි මොබයිල් එක ඕෆ්.
දැන් මොකද කරන්නෙ ගත්තා ලෑන්ඩ් ලයින් එකට.
රුචිර : හෙලෝ
එහා පැත්තෙන් : හෙලෝ. කවුද කතා කරන්නෙ?
රුචිර : මම මේ හිරාන්ගෙ ඔෆ්ස් එකෙන් කතාකරන්නෙ. හිරාන් ඉන්නවද?
එහා පැත්තෙන් : හිරාන් නෑනෙ. මම මේ හිරාන්ගෙ අම්මා කතා කරන්නෙ.
දැන් රුචිරය කල්පනා කරනවා මූ මට සහලෝලා උන කියලා රට වටේ රව්ම් ගහනවා. දෙන්නම්කො ඕකට ලීව් මීට පස්සෙ.
රුචිර : ආහ් ආන්ටි මම මේ කතා කරන්නෙ ඔෆිස් එකේ පොඩි ප්‍රශ්නෙකට. හිරාන් ආවහම කියන්නකො රුචිර කෝල් කලා කියලා.
එහා පැත්තෙන් : ඇයි අපේ පුතාට මොනව හරි කරදරයක්ද?
(අම්මා බය වෙලා...)
රුචිර : නෑ මේ හිරාන් ලියපු කෝඩ් එකක් හොයාගන්න බෑ. මේ XXX ක්ලාස් එක හිරාන් කොහේ දාලද දන්නෙ නෑ ඒකයි. කමක් නෑ හිරාන්ට කියන්නකො මට කෝල් එකක් දෙන්න කියලා ආපුගමන්ම.
දැන් හිරාන්ගෙ අම්මට ආත භූත වගේ. මොකක්ද අප්පේ කෝඩ් කියන්නෙ. අම්මා හොදටම භය වෙලා.
ඔන්න රස්තියාදු ගහලා ගහලා අපේ එකා ආව ගෙදර. එන කොටම අම්ම ඉන්නව ගේට්ටුව ගාව. මූනත් අප්සෙට් වගේ.
හිරාන් : මොකද අම්මෙ මූනත් කලු කරගෙන?
අම්මා : මොකද තමයි. මොනවද උඹ ඔෆිස් එකෙන් හොරකන් කරගෙන ආවේ. අන්න උඹෙ ලොක්කා කොල් කලා. මොනවද බන් අපිවත් අමාරුවෙ දාන්නෙ නැතුව ඔන්න ඕක හෙටම ගෙහිනින් දියන්.
අම්ම හිතලා තියෙන්නෙ මූ මොනවහරි ඔෆිස් එකෙන් උස්සන් ඇවිල්ලා කියලා. ඇයි ඉතින් අම්ම දන්න කොඩ් එකක් තියෙනව යෑ.
